Nijverheid

In 1926 kreege de Gebr. Van Cleef toesjtumming de pannesjop, gelaege tösse de Juliansjtraot en de Prins Hendriksjtraot, later de Pr. Frederiksjtraot geneumd óet te bereide met 2 äöves en ein bergloods.

Gebr. van Cleef Electrische Dakpannenfabriek

Dit waas de offisieele naam van de ut bedriëf, maar weej gebroekde dae naam noets. Janssen-Dings had ein pannefebriek en Tuünke (Van Cleef) had eine pannesjop. Eind  50-jaore waare die gebouwe, vergeleeke met die van JD, ouch ech aajerwets. Dôw kôs good zéen det d'r al jaore neet mier geïnvesteerd waas. Weej zooge dao den ouch zelde eine vrachwaage sjaon öm panne te laaje. Ein hendje vol minse zörgde nag veur de produksie. Det waas in de beginjaore tog waal efkes angers. In 1875 sjtart Wilhelmus Hubertus Van Cleef in Geloë  met ein vur daen tiéd vreej modern bedriëf. Ut waas de iërste pannesjop met ein "massaproduksie". Ondanks det bienao alles hangkwêrk waas, woort d'r tog op groëte sjaol panne gemak. In 1916 köp de firma Van Cleef de besjtaonde febriek van Jan Jacobs (de toenmalige börgemeister) aan de Julianasjtaot. Jan Jacobs had in 1891 vergunning gekreege öm beej de Kret (thans Kleistraat-Pannenstraat) ein sjtoumpannefebriek op te richten.   Nao de iërste wereldoorlog is d'r vuël vraog nao panne en den geit ut prima met ut bedriëf.

Ut bedriëf in Geloë

In 1910 wêrkde dao 20 minse.

In 1921 waas de weduwe van W.H. van Cleef de enige eigenares.

In 1922 waas ut ein van de iërste bedriéve met eine elektromotor van 5 PK vur de kleimeule en eine motor van 30 PK veur de angere kleibewêrkingsmasjienes.

In 1927 makde ut bedriëf naeve de gewoëne holle panne dreej masjinaal geproduseerde modelle te weite: muldepanne, krütspanne en Tuiles du Nord.

Ut bedriëf f had toen 12 Kasseler-äöves.

In 1928 waere dees elektromotore vervange door zjwaordere van respektievelik 7 en 60 PK.

In 1962 is de daakpanneproduksie definitief sjtop gelag.

de pannesjop van Tuünke in Geloë aan de Kapelkeswaeg

St. Andreas fúus

Met 13 jaor ging ôzze pap beej Fúus Maan wêrke. Dae man had dae beejnaam, umdet hae beej de fúus wêrkde. Wat waas eigelik die fúus? Rôngk de ieuwwisseling (eind 1800-begin 1900) karnde de boere zelf bôtter en brachte die vur de verkoup nao de Venlose mert.  Maar al gauw kwaam de coöperatieve verwêrking van de melk in de fúus, ut bôtterfebriekske van de Belvender boere. Die febriek loog aan de Sjoëlsjraot op de plek wao vruuger Toos van de Sjilder met ziene verf- en drogiswingkel haet gezaete. Jaorliks waas d’r ein insjriéve vur de mêlkriejers. De liegste dreej insjriévers kreege vur ein jaor de vrachte toegeweeze öm de melk beej de boere op te haole. De melk woort in de fúus toet 30^o C verhit en daonao met de hangkcentrifúusj toet bôtter verwêrk. De ôngermêlk ging as viejevoor truuk nao de boerderie. De bôtter ging aanvankelik in vaate. Later verpakde ze de bôtter in pepeer. Ut grôtste deil van de produksie ging nao de Ned. Zuivelbond. Die had eur mien (ein veiling) in Mesjtreech. Ilke waek ginge met ut sjpaor inkele vaate dao nao toe. In de fúus wêrkde twie minse.

Nao de iërste Waereldoorlog kwaame d’r nieje richliene vur de produksie van bôtter. Ônger angere ut verhuuge van de temperatuur um ut nag mier bacterie vreej te maake. Heej door môs d’r behuurlik geïnvesteerd waere in ein nieje installaatsie. Met as gevolg: ut einde van de bôtterfabricage in de fúus. Toen ginge de boere zellef met de melk langs de deur en de melkventers óet Tegele kwaame in Belvend de melk koupe. Maar gaonderwaeg kwaame d’r sjteeds mier grôttere coöperatieve zuuvelfebrieke, ônger angere in Venlo. En toen woort dao de mêlk aangeleeverd.

Bron: Simons-bulletin nr. 107, sept. 2005

Meubelfabriek Stevens

Ut bedriëf is opgerich in 1919 vanóet ein dörpstimmerbedriëf.

In 1930 haet ut bedriëf 8 man personiël. Door de taegesjlaeg in de 30-jaore blief ut allemaol bescheide. In 1935 wuërd de febriek óetgebreid en greujt nao 12 man personiël. Nao 1945 is de wederopbouw van de meubelfebriek. Zoon Fons nimt de leiding van vader Handrie euver. Het imposante bedriëf haet mier den 20 personeelslede.

bron: Tgelse Courant d.d. 17 mei 1963