Belfeld |
Ut veurmalige gemeintehóes van Belvend is in 1916 gebouwd en waal op de plaats wao út vurrige haet gelaege. De architec waas Lambert Noten en aannimmer H. van Aanholt óet Tegele haet ut werk gedaon veur fl. 7510,- In ein tiëdsbesjtek van zô'n gôije 60 jaor zien heej de besjlissinge door de börgemeister en zien raod genaome. Börgemeister van Rijckevorsel haet heejvan 1952 toet 1971 zien werkkamer gehad. Börgemeister Visschers waas ziene opvolger. Dae haet onnag ein tiedje op ut raodhóes aan de mert gezaete, maar is in oktoeber 1976 met zien werknimmers nao ut Hamarcomplex gegaon. In mei 1993 kump ut gebouw in particulier bezit.
|
De ligging van Belvend
Belfeld ontwikkelde zich oorsjprônkelik as Maasdörp, met as logisch gevolg det de kerk vlakbeej de rivier woort gebouwd. Door de aanlegk van de Riëkwaeg Venlo - Roermond en de in november 1865 geäöpende spaorliën tösse veurneumde sjtaej, kwaame in ut dörp barrières, waodoor de aaje kom in dreej deile woort gesplits. Ut is den ouch vanóet stedenbouwkundig ougpunt fout gewaes de nieje kerk in 1913 te bouwe op de aaje plaats.
Door de totale verwoesting van de kerk tiédes de 2e WO waas de óetbreiding van de kernbebouwing aan de oëskangk van de spaorliën logisch. Teves waas heej genôg terrein aanwezig. Dit gebied bestông óet woeste grôngk en sjloot good aan beej de bestaonde bebouwing. Heej kôste mekkelik ein paar hôngerd wuninge gebouwd waere, zônger de langkbouw en de natuur sjaai aan te dóon.
In 2005 wuërd d'r begôs met de aanlegk van de autowaeg R-73 dwars door Belvend van noord nao zuid. Deze autosjnelwaeg doorsjniet de Venwaeg, de Malbeckerwaeg, de Brooksjtraot, de Baolebergwaeg en de Hoverheidewaeg. Alwir ein barrière in ut dörp. Heejdoor kênne de wandelaers en de fietsers ut natuurgebied langs de Pruuse bos minder mekkelik bereike.
De Riëkswaeg löp parallel aan de Maas, die de westelikke grens vormt. De oostelikke grens met Duitsland is op eine aafsjtand van zôn 3,5 kilomaeter. De zuidgrens met Ruiver (gemeinte Beesel) en de noordgrens met Tegelen(gemeinte Venlo) ligke zoewet 4 kilomaeter óet ein. De oppervlakte van Belfeld is 1395 ha of te waal bienao 14 km2 Tegelen 1042 ha Venlo 4677 ha.
Toet 31 december 2000 is Belvend ein zelfsjtandige gemeinte gewaes. Per 1 jannewarie 2001 is Belvend ein sjtadsdeil van de gemeinte Venlo. In 1800 waar W. van Dijck de iërste börgemeister. Frans van Beeck sjteit als letste op de liës van de 16 börgemeisters.
|
De bevolkingsgreuj
telling per 1 jannewarie 1900 959 inwoéners 1910 1160 1920 1486 1930 1897 1940 2159 1950 2620 1960 3371 1970 4301 1980 4689 1990 5207 2000 5408
|
Beroepsbevolking Van oorsjprông vuël minse werkzaam in de langkbouw
1930
35% van de beroepsbevolking is werkzaam in de langkbouw 57% in de indusjtrie 8% euverige beroepe
|
1962
80% in de indusjtrie 10% in de langkbouw 10% euverige beroepe
|
In 1969 is nag maar 7% van de beroepsbevolking werkzaam in de langkbouw en 78% in de indusjtrie. D'r is fabricage van panne en gresbuze, meubels en metaalware. Verder is d'r onnnag ein iezergeterie en sjteinbewerking. |
De plaatsnaam
Euver ut ônsjtaon van de plaatsnaam loupe de meininge nagal óet ein. De naam Belfeld besjteit óet twië deile: Bel en Ven of Veld. De verklaoring vur ut letste gedeilte is waal dudelik: Ven is ein peulke op de hei en Veld is aope langk. Met name euver ut iérste gedeilte is ein meiningsversjil. Ein verklaoring is det Bel aafkomstig is óet de germaanse wäörd Balwa (sjleg) + Lauha (böske op hoëge zangkgrôngk) . De naam Belfeld kênse den ömsjrieve as: veld beej ein böske op sjlegte hoëge zangkgrôngk. Ein angere verklaoring is det Bel zien oorsjprông vingk in ut Griekse waord Phalos (bleik) en ut dao aan verwante Germaanse waord Bala. Ut Hollandse waord bles (witte plek op de kop van ein paerd) is dao wir vanaaf geleid. De naam Belfeld zouse den kênne óetlegke as paerdeveld. Eine derde óetlegk is de volgende: Bel of Bol of Bool beteikent: neet vas, onzeker, zômpig. Belfeld is den de verklaoring vur ein zômpig gebied. De naam Belven kump al in ein berich óet 1326 veur. In 1394 sjprik men van Bollefelt. Ôngevier 200 jaor later versjiënt de naam Bellfendt. In 1647 de naam Belsveldt. Nao 1800 wuërd vreejwaal allein de naam Belfeld gebroek. bron: Belfeld Van Eeuwwisseling naar Eeuwwissseling
|